الأربعاء، ٢١ فبراير ٢٠٠٧

احتــــــــــــــــــــــــلال

فتشى عنى ف مرايتك
هتلاقينى
أحلى تفصيله ف ملامحك
جوّا ننك تلمحينى
نقطة الضى الوحيده
تشتاقيلى
أنهمر ويّا الدموع
وف ضلوعك انفرد
وابقى تنهيدة حنينك للرجوع
وانفلت من بين شفايفك
كلمة الحب الأكيدة
تحضنى كفك بكفك
أبقى انا الرعشة اللى بينهم
تندهيلى .. ابقى صوتك
تسكتى .. اسكن سكوتك
وابقى انا باقى الكلام.. اللى مش قادرة تقوليه
جوّا أحلامك أنا
بين مقامات الغنا
بين ضفيرتك خصلة رابعة
فى ابتسامتك باترسم
حتى أوقات التمرد
بتلاقينى فى انفعالك
ويّا تبريقة عنيكى
ويّا تشويحة ايديكى والشتيمة
وابقى اصرارك فى عندك
وابقى غيظك
وابقى رفضك للهزيمة
..... وابقى انا برضه البلاده
لما بتهون المشاعرـ لو للحظه ـ جوّا منك

..... واما بتخونى ف خيالك حبنا
بابقى انا صورة عشيقك
وابقى انا الرغبة ف كيانك
وابقى انا حمرة كسوفك
وابقى تسبيلة عنيكى
وف خيالك تحضنينى
أبقى تعشيقة ايديكى
وابقى انا البوسة ف جبينك
وانتشر زى اللهيب
وابقى انا حرقة نهودك
وابقى تشنيجة سنانك
وابقى اهة نشوتك
وابقى حبات العرق
وابقى انفاس التعب والارتياح
.........................
وابقى خجلك من دا كله
وابقى احساسك بذنبك
وابقى شماعة خطيئتك
وابقى ندمك
وابقى تقواكى وورعك
... حتى أوقات الشجن بابقى انا عقدة جبينك
فى انتظارك .. بابقى انا أنّات سنينك والزمن
وتلومينى ؟
مين يلوم عاشق بيحتل الوطن؟!!!!!!!!؟

هناك ٣٠ تعليقًا:

Memo يقول...

اول انسلن
دي تاني مره افتح المدونه بالصدفه
بس المره دس هعلق شيل الفريفيكايشنننننننننننن

عادل سلامة يقول...

اهلا بيكى ياميمو منورانى ويارب ماتكونش اخر مرة

بس انتى عايزانى اشيل ايه مش فاهم .. ايه الفريفيكاشننننن ده ..
على العموم انا غلبان تكنولوجيا ولا بعرف اشيل ولا احط .. علقى انتى بس وهتلاقى تعليقك مهما كان .. بس بالراحة عليا والنبى الله يخليكى

Foxology يقول...

عادل باشا مساء الفل... وحشتنا حاجاتك الحلوة ... فاكرنى؟؟ انا فوكس

عادل سلامة يقول...

اهلا يا فوكس .. انساك ازاى .. انت اول حد يكلمنى بعد نزول الديوان
نفسى اشوفك ع الطبيعة بقا
واتصور معاك واقول لصحابى كلهم ان الراجل ده هو اللى قلتلكوا عليه انه اشترى الديوان بتاعى .. ههههههه
صباح الفل يامنورنى

حدوته مصرية يقول...

قصيدة جميلة اوى يا عادل
بجد انت جمييل

و ميمو تقصد الكلمة اللى لازم نكتبها كل مرة عشان نعلق WORD VERIFICATION

تحياتى

nour يقول...

يا معلمممممم
انت يا بنى ملكش حل و كل لما اقرالك حاجة تبقى منطبقة على المود بتاعى لحظتها
و بعدين انا مش عارفة اجيب الديوان بتاعك منين يا عم
طب اقولك على موقف
كنت بلف على الديوان بتاعك و بعدين دخلت مكتبة و بقول للراجل عايزة ديوان الحب فى الجامعة لعادل سلامة شوية لقيتة جايبلى كتاب بيقولى ده؟؟؟
تخيل لقيته ايه
لقيته كتاب لراجل كده داعية اسلامية و عامل كتاب بيتوعد فيه طلبة الجامعة بالويل و الثبور و عظائم الامور لو حبوا فى الجامعة قلتله لا يا عم مش ده خاااالص
سلامو عليكوا
بصراحة خايفة ادور تانى
:))))
لا بس انا وراه و راه و هجيبه برضه

عادل سلامة يقول...

الله يخليك ياعم ياسر يا جميل .. طب يا معلم انت معاك تليفونى ابقى كلمنى قولى بيتشال ازاى .. انا تحت امر ميمو

عادل سلامة يقول...

الله يخليكى يانور .. مش عارف اقولك ايه على التعليق الحلو ده .. وفيه حد قالى على كتاب الداعية ده وانا مش عارف كتاب مين قبل التانى .. ياما انا الاول وهو عمل ده عشان يهددنى .. يا اما هو الاول وانا عملت ديوانى عشان اغيظه

المهم .. الديوان مش موجود منه فى السوق لانه من بقاله كتير والحمد لله نفد تقريبا وانا ماطبعتش تانى كسلا وقلة وقت وقلة دماغ وقلة ادب

المهم انا لسه عندى شويه هحاول احطهم قريب فى مكتبة ديوان اللى فى الزمالك ان شاء الله

غير معرف يقول...

الشعر نفسه حلو...بس كلامه جرىء شويتين تلاتة اربعة..خصوصا اخر جزء فيه

غير معرف يقول...

Hi ya gameeel ... i hope u still remember me...ana 2olt 22asalm 3alik ya 3adel..w 3ayz 2a2olak ana 7atit (la7zt taish) fi el blog 3and...bas 5alif 3ala 72o2 el tab3 w keda...2aw3a ta2adini... bas dont worry ana 2olt anaha man2ola...yala ya gamel ..3ayzeen kalam ba3id 3an el 7ob shwaya ..eih ra2yak?

عادل سلامة يقول...

دونت وورى يا مان .. يو كان دو وات يو سى .. اّى كان نوت دو إنى ثينج اكسبت ثانك يووووو

ماهو هتكتبلى عربى بحروف انجليزى وتعذبنى هكتبلك انجليزى بحروف عربى واروشك

غير معرف يقول...

يا باشا مش قصدى ...بس انا متعود اكتب كدة...عموما نكتب عربى عشان خطرك....براحه عليه وحياتك

عادل سلامة يقول...

يامعلم انت تنورنى ان شالله تكتب هندى يا جميل .. انا بقفش معاك عادى يعنى .. اصل الكتابة الفرانكو دى بتتعبنى جدا وتلات اربع الكلام بيقع منى ..
وميرسى على نقلك لحاجاتى عندك وده طبعا يشرفنى
وان شاء هتلاقى حاجات بعيدة عن الحب .. تحت امرك يا جميل

غير معرف يقول...

جميل يا عادل ‘ وأوعي تبطل تكتب
أكيد هانتقابل تاني

تحياتي
علي سلامه

عادل سلامة يقول...

استاذنا الجميل ..
انا فعلا بقالى كتير ماكتبتش .. بس بعد ماشوفتك فى حفلتك مع وجيه الجميل .. شحنت من جديد

وكونك ترد كمان عندى فى المدونة دا يدينى ثقة اكبر



بجد والله العظيم مافيش حد مسنى وأبهرنى وملا عينى وأضافلى من شعراء العامية من بعد جيل الكبار .. الا على سلامة.. وشاعر الغنا الحقيقى حسن رياض ..

بالنسبة لعم حسن ..خلاص قفشته و بقا اقرب صديق ليا فى الدنيا .. عقبال يارب ما اقفشك انت كمان

اطمن يا استاذ .. انا مش هبطل كتابة لإن ده مش اختيارى .. وكمان مش هبطل كتابة عشان نتقابل تانى

شكرا من هنا لغاية ماشوفك

أخف دم يقول...

عادل باشا سلامة
انت عارف ان القصيدة دى بالنسبة لى من أجمل قصايدك .. فمش هاعرف اعلق عليها ..
إنما ممكن أعلق على عادل سلامة الجميل واقول له :
ما تتقلش علينا يعنى.
واحشنى بجد..

غير معرف يقول...

gameela..

فتاة عشوائية يقول...

طول عمرك متألق يا عادل
:)
ازيك
انا علا يا ترى فاكرنى؟
بجد من زمان اوى وانا بتعجبنى القصيدة ديه جدااااااااااا
من أول مرة قرأت فيها كتابك
يا رب نشوف حاجة تانية قريب بروعة وجمال أكتر

الوردة السوداء يقول...

الله عليك

Halawa يقول...

ازيك ياملك

ماشاء الله سمعت عنك
من احمد عبد الحي وأخف دم

قصيدة مجرمة بجد

سلملنا على الاستاذ علي سلامة لما تشوفه
قله تراب مصر بيحبك وبيحترمك

loving girl يقول...

جميله اوي ومعبره هي صحيح جريئه حبتين في الاخر بس حلو

gooooooooooo on

غير معرف يقول...

لا بس معلش
ايه كل الجمال ده
و ليه يعنى ؟

وجعتنى

MaMaDo يقول...

من زمااااااااااااان و انا بسمع عن
عادل سلامه
و ده الى خانى ادخل البلوج
بس الوقتى بجد انا الى هحكى عنك
بجد كلامك جامد كله

و يا رب ديما


تحياتى

احمد عبد الهادي يقول...

جامده مووووووووووت
برافو عليك والله يا عدوول
عاوزيين نشوفك ياعم
انت غطست فين كده

حاول تفتكرني بقي

احمد عبد الهادي يقول...

جامده مووووووووات
برافو عليك والله يا عدووووول
ابقي خلينا نشوفك ياعم


حاول تفتكرني كده !!!!!

دعاء عبده يقول...

قصيده جميله

أنا سمعتك مره فى لقاء تليفيزيونى زماااااان وعجبتنى قوى قصيده ليك كنت بتقول فيها

عيد ميلاد حبيبتى قرب
وامتحان الترم قرب



تحياتى

غير معرف يقول...

وااااااااااااااااااااااااااااو

توحفه جدددددددددددددددددددددددن


تسلم ايديك

توتة يقول...

هاى عادل
انا لمية ::طبعا عارف رايئ
بجد هزتنى جامد قوى
ومن اول ما قرتها مش قادرة انساها
ربنا يوفقك

Dr.Diamond86 يقول...

أول مرة أدخل المدونة
بس جميله القصيدة بجد
وحتى لو كانت جريئه
ده احلى ما فيها

maha يقول...

سلام عليك يا صاحب المدونة لجميلة دي
بجد رائعة
اول مرة ااقرا بوست و احس اني عايزة اصقف من فرحتي بكلام قريته
فنان بجد جميلة جدااااااااااااااااااااا
اول زيارة في مدونتك
و ان شاء الله مش الاخيرة
سلام
مها