الخميس، ١٩ يوليو ٢٠٠٧

وقفت لغرورك



مين قال انى حبيتك
ومين قال انى صدقتك؟
انا شفت ف عنيك كدبك
جيت تخدعنى فسبقتك

فاكرنى وقعت فى بحورك؟
أنا اللى وقفت لغرورك
وأول مرة بتقابل
حبيبة مثلت دورك

بقى جايلى
تودعنى
وقال يعنى
بتتصعّب على حالى
وقال ندمان ؟ ماتندمشى
مايصعبشى عليك غالى

فاكرنى وقعت فى بحورك؟
أنا اللى وقفت لغرورك
وأول مرة بتقابل
حبيبة مثلت دورك

بتوعدنى
وبتسبنى
وتحسبنى
بشوقى وحبى جايالك
واديك انت على ايدى
وقعت ف شر أعمالك

فاكرنى وقعت فى بحورك؟
أنا اللى وقفت لغرورك
وأول مرة بتقابل
حبيبة مثلت دورك

وقفت لغرورك .. سلمى .. ألبوم : وقفت لغرورك .. كلماتى .. لحن أحمد محيى .. توزيع محمد مصطفى

الكليب .. فكرة أسماء احمد

vasco: اخراج
بلغاريا 2007

ممكن تشوف الكليب على الموقع ده http://www.nastube.com/Watch.aspx?id=2916

الجمعة، ٦ يوليو ٢٠٠٧

بتتكلم براحتك

بتتكلم براحتك
دى الاغنية اللى انتو سامعيناها دلوقتى
اغنية جديدة
كلماتى
لحن احمد محيى
توزيع مدحت خميس
غناء المطربة التونسية : هادية

الاثنين، ٢١ مايو ٢٠٠٧

عيد ميلاد حبيبتى

عيد ميلاد حبيبتى قرب
وامتحان الترم قرب
لو مكانى تعمل ايه؟
تشترى هدية لحبيبتك؟
واللا .. تشترى كتاب الاجتماع؟
صاحبى قالى : مش هتنفعنى حبيبتى لو هاعيد علشان خاطرها
قلتله: لو هازعّل يوم حبيبتى مش هلاقى حبيبة غيرها
يعنى ايه كام ألف نجحوا .. عملوا إيه
ع القهاوى ملقّحين
امتياز مقبول وجيد
زى بعض مشرّفين
والدكاترة ف كل عام
باعوا كل المطبوعات
واحنا خدنا منهم ايه .. غير شوية معلومات
بكرة هتطير من دماغنا
ويا دخان السجاير ع القهاوى
ويا مانشيت الجريدة
ويّا تصريح الوزير
شوف يا صاحبى
هاشترى هدية لحبيبتى
واللى يتبقى معايا
ابقى اجيب بيه الملخص
واضربه ف اخر يومين
ايه هيحصل لو سقطت؟
يبقى زاد عمرى سنة
والسنة الجاية هتسقط هى وترد الجميل
والقهاوى مش بعيده
يكرة هتخرّج والاقى
كرسى ع القهوة الجديدة
اللى كل يوم بتفتح
حاجة ساقعة لخريجين
ودّعوا الحب ف حياتهم
وابتدوا مشوار حزين

الجمعة، ٢ مارس ٢٠٠٧

no title

الأربعاء، ٢١ فبراير ٢٠٠٧

احتــــــــــــــــــــــــلال

فتشى عنى ف مرايتك
هتلاقينى
أحلى تفصيله ف ملامحك
جوّا ننك تلمحينى
نقطة الضى الوحيده
تشتاقيلى
أنهمر ويّا الدموع
وف ضلوعك انفرد
وابقى تنهيدة حنينك للرجوع
وانفلت من بين شفايفك
كلمة الحب الأكيدة
تحضنى كفك بكفك
أبقى انا الرعشة اللى بينهم
تندهيلى .. ابقى صوتك
تسكتى .. اسكن سكوتك
وابقى انا باقى الكلام.. اللى مش قادرة تقوليه
جوّا أحلامك أنا
بين مقامات الغنا
بين ضفيرتك خصلة رابعة
فى ابتسامتك باترسم
حتى أوقات التمرد
بتلاقينى فى انفعالك
ويّا تبريقة عنيكى
ويّا تشويحة ايديكى والشتيمة
وابقى اصرارك فى عندك
وابقى غيظك
وابقى رفضك للهزيمة
..... وابقى انا برضه البلاده
لما بتهون المشاعرـ لو للحظه ـ جوّا منك

..... واما بتخونى ف خيالك حبنا
بابقى انا صورة عشيقك
وابقى انا الرغبة ف كيانك
وابقى انا حمرة كسوفك
وابقى تسبيلة عنيكى
وف خيالك تحضنينى
أبقى تعشيقة ايديكى
وابقى انا البوسة ف جبينك
وانتشر زى اللهيب
وابقى انا حرقة نهودك
وابقى تشنيجة سنانك
وابقى اهة نشوتك
وابقى حبات العرق
وابقى انفاس التعب والارتياح
.........................
وابقى خجلك من دا كله
وابقى احساسك بذنبك
وابقى شماعة خطيئتك
وابقى ندمك
وابقى تقواكى وورعك
... حتى أوقات الشجن بابقى انا عقدة جبينك
فى انتظارك .. بابقى انا أنّات سنينك والزمن
وتلومينى ؟
مين يلوم عاشق بيحتل الوطن؟!!!!!!!!؟

الجمعة، ٢٦ يناير ٢٠٠٧

ماكنتش بعرف

ماكنتش بعرف اقول حبيتك
علشان انا وانتى ف نفس السن
وكإن
الحب اتحرّم على قلبين من نفس السن
وماكنتش بعرف احكى مشاعرى لحد عشان الظن
وماكنتش بعرف ابص ف عينك
جوّا عنيكى مداين حزن
وماكنتش بعرف أمسك ايدك جوا الجامعة
عشان الأمن

الثلاثاء، ١٩ ديسمبر ٢٠٠٦

لحظة طيش

فى لحظة طيش
غلطت وقلت: بهواكى
ماكدّبتيش
وقلبك دق جواكى
ماحبتكيش ولا حاجة
لكن جيتلك كما المشتاق
انا أصلى بقالى كتير ماعشتش عيشة العشاق
دى كلمة وقلت اجربها وجت فيكى
فى لحظة طيش
لقيتك معجبة بيّا
وقلبى خالى مش مشغول
وكانت نظرتك ليا
تحرضنى بإنى أقول
كلام قلبى ماصدقهوش
لكن قلته
فى لحظة طيش
ماحبتكيش وكان ممكن
أقابل فى الطريق غيرك
هوايا ف قلبها يسكن
لكن حظك يكون دورك
بطولة ف قصة مش بتعيش
وعنوانها
فى لحظة طيش