الثلاثاء، ١٩ ديسمبر ٢٠٠٦

لحظة طيش

فى لحظة طيش
غلطت وقلت: بهواكى
ماكدّبتيش
وقلبك دق جواكى
ماحبتكيش ولا حاجة
لكن جيتلك كما المشتاق
انا أصلى بقالى كتير ماعشتش عيشة العشاق
دى كلمة وقلت اجربها وجت فيكى
فى لحظة طيش
لقيتك معجبة بيّا
وقلبى خالى مش مشغول
وكانت نظرتك ليا
تحرضنى بإنى أقول
كلام قلبى ماصدقهوش
لكن قلته
فى لحظة طيش
ماحبتكيش وكان ممكن
أقابل فى الطريق غيرك
هوايا ف قلبها يسكن
لكن حظك يكون دورك
بطولة ف قصة مش بتعيش
وعنوانها
فى لحظة طيش

هناك ١٧ تعليقًا:

bagabigo يقول...

بحبها اوى يا عادل بس اكيد بحبك انت اكثر :)

أحمــــــــدبــــــــــلال يقول...

و الله و الله و الله
الموقف ده حصل معايا بالظبط
مش مصدق انك كاتب عن موقف زى ده
فعلاً كان حبى ليها لمجرد انى محتاج للحب
أنا عارف انى كده انانى بس فعلاً طلعت هى بتحبنى من مدة و زى ماتكون مستنيانى أقولها بحبك
و لو بالهزار
و أستمرينا ثلاث سنوات و لكن للأسف ماقدرتش أكمل
مشاعرى مش معاها
و مش مع حد معين بس مش قادر أقولها بحبك و أنا مش حاسسها

متغيرة شوية يقول...

زي ما عنوان الديوان بيقول الحب في الجامعة، فالقصيدة دي typical حب الجامعة..
حب لأجل الحب ليس الا.. علشان كل الناس حوالينا بتحب يبقى " الله ، ليه لأ احنا كمان"
وعلشان كده حب الجامعة غالبا بيبقى فاشل

في نقطة مهمة كمان.. القصايد بتاعتك قريبة قوي من الناس..المصطلحات والتراكيب والمواضيع ..علشان كده بتوصل بسهولة

nour يقول...

يا بنى انت افكارك فظيعة احلى حاجة فيها انها الحكاية دى بتحصل كتييير بس محدش بيقف عندها و يخليها حالة زى ما انت عملت كده..مش بقولك عندى هوس بالشعر بتاعك:)))

عادل سلامة يقول...

بجابيجو .. ميرسى جدا على التعليق الجامد ده
احمد بلال .. ميرسى ياباشا على زياراتك الدائمة .. وانا مبسوط البوست ده عجبك ..
متغيرة شوية .. حب الجامعة فاشل .. بس عسسسسسسل
نور .. ماتكبريش الموضوع .. لا افكار فظيعة ولا حاجة .. دى أقل حاجة عندى
هههههههه

nour يقول...

و متواضع كماان؟؟
:))))
لا بجد تستاهل
على قدك يا معلم

SaSo يقول...

متحطلنا "مأساه عبدو" ياعادل,سبيشيال ريكوست فور مى ياريت

شوق الياسمين يقول...

دى أنانيه يا عادل أنت وأحمد بلال

بس القصيده رائعه

أحمــــــــدبــــــــــلال يقول...

الى شوق الياسمين
و الله أنا شايف أنى أسيبها كان أحسن مافضل أخدعها كل الوقت ده
و بعدين ماكونتش هاستحمل كل الوقت ده
و خصوصاً أنها كانت غيورة جداً لدرجة أنها غارت من أصحابها الانتيم لمجرد أنهم بيكلمونى
و غارت كمان من أصحابى الصبيان كمان علشان بقضى معاهم وقت أكبر

دبابيس يقول...

عادل سلامة صديقي الجميل اناهستغل البلوج بتاعك عشان اشكرك مش هعلق على الكلام انا بس عاوز اقولك اليومين اللى انت قضيتهم معايا بجد من اجمل الأيام واجمل حاجة فيهم موضوع البلوجر ده عالم تاني جميل مكنتش واخد بالي منه فرحت بيه قد فرحتي بقناة الجزيرة ذي ما اخيرا بقى عندنا نشرة اخبارية بصحيح بقى عندنا ناس بتكتب بصحيح ياه اخيرا لقيت ناس بتفهم وبتعرف تناقش وتتكلم وعندها حاجة عايزة تقولها والأجمل التواصل فيه تواصل بصحيح وتلاقي افكار واحمل واجمل انالناس البلوجر دول مش منفسننين ذي بتوع نوادي الأدب وقصور الثقافة . اخيرا ناس بتفهم ومش منفسنة ايه الحلاوة دي تحية للمدونين ولعالم التدوين - جيل التقنية – يحيا المدونونون المتحدون .. عادل فتحت اخيرا شباك جديد في حياتي على عالم جميل . شكرا صديقي الجميل

Unknown يقول...

الله على الجمال .. جميله..جميله بجد
..من القلب اوى :)

tamer afify يقول...

أنا أصلي بقالي كتير معشتش عيشة العشاق


وانا برده بقالي كتير مشوفتش قول كما قولك
أسلوب رائع
لغــة حية
إيقاع مبدع
تحياتي

nour يقول...

ايه يا عم عادل انت مشغول فى الامتحانات و لا ايه؟؟؟؟؟؟؟؟؟
مفتقدينك

عادل سلامة يقول...

شكرا على مرورك وتعليقك يا شوق الياسمين ..
منور يا ابو كامل .. المدونة بتاعتك عسسسسسسل
مويا .. ميرسى على تعليقك قوى
تامر عفيفى . ربنا يكرمك ياراجل يا ذوق
نووووووووور .. دا احلى تعليق شوفته .. امتحانات ؟ والله وحشنى الكلام ده .. انا مطحون فى الحياة .. انا عجوز يا نور .. متخرج 1999

علي الالفي يقول...

ممكن اسال سؤال بسيط جدا
عندك مانع انى الحنها؟

تنورنى في اي وقت

عادل سلامة يقول...

اتفضل يا جميل لحنها ومن غير ماتستأذن اى حاجة تعجبك اعتبرها بتاعتك

شكرا على اهتمامك وابقى سمعنى ياريت

نهى جمال يقول...

همر هنا كتير

رائع

وموجع


تحياتي لكَ